Rom 3 | ENQ | STEP | Dopana, Juta dupa-kisa epe aki mende silyamopa endakali tata waka dupa nyoo ana pyandao katengemape? Akalinya elya pingi kambu kepenge mana dokonya epe aki mende pyakalyingipi?

a3:2Wee 147:19-20; Lo 9:4-5

b3:3Wee 89:30-37; Lo 9:6, 11:29; 2 Ti 2:13

c3:4Wee 51:4, 116:11

d3:5Jop 34:12,17; Lo 1:18, 5:9

e3:7Lo 9:19

f3:8Lo 6:1,15

g3:9Lo 1:18-32, 2:1-29, 3:23, 11:32

h3:10Ekl 7:20

i3:10-12Wee 14:1-3, 53:1-3

j3:13Wee 5:9, 140:3

k3:14Wee 10:7

l3:15Pot 1:16

m3:15-17Ais 59:7-8

n3:18Wee 36:1

o3:19Jo 10:34, 12:34, 15:25; Lo 2:12; Ga 3:22

p3:20Wee 143:2; Ap 13:39; Lo 7:7; Ga 2:16, 3:11

q3:21Ap 10:43; Lo 1:17, 10:5; Pl 3:9; 2 Pi 1:1

r3:22Lo 1:17, 4:5, 9:30, 10:12; Ga 2:16

s3:23Lo 3:9, 5:2,13

t3:24Dan 9:24; Lo 4:16, 5:1,9; Ep 1:7, 2:8; Kl 1:14; Ta 3:7; Ip 9:15

u3:25-26Ais 53:11; Ap 17:30; Lo 5:6, 11:30; Ep 1:7; Kl 1:20; Ip 2:17; 1 Jo 2:2, 4:10

v3:27Lo 2:17, 4:2-3, 5:2, 11:18, 1 Ko 1:29-31, Ga 6:13-14, Ep 2:9

w3:28Ap 13:39; Lo 5:1; Ga 2:16

x3:29Ap 10:34-35; Lo 9:24, 10:12

y3:30Dit 6:4; Lo 4:11-12,16; Ga 3:20

z3:31Mt 5:17; Ap 24:14; Lo 8:4

Romans 3

1 Dopana, Juta dupa-kisa epe aki mende silyamopa endakali tata waka dupa nyoo ana pyandao katengemape? Akalinya elya pingi kambu kepenge mana dokonya epe aki mende pyakalyingipi? 2 Doko, ^a mana tata tata dupa pitakanya Juta dupame endakali tata waka dupa etete longome ita miningima. Angi mupa doko, Goteme baanya pii lapae dupa Juta dupame isekena lao maiya-pyaa. 3 Kini, ^b nyakamanya endakali yangi dupame Gotenya pii dupa watao minala nayamino dokome aipa pitape? Endakali dupame Goteme leamoli napiamino dokome Goteme lelyamoli pingi mana doko mee injisetape? 4 Daa, ^c etete dopa napita! Endakali dupa pitakame sambo latala lataminoli napitamiaka doko, Goteme sambo laa nayao latamoli pyoo kiningi pita. Pii pepa pyapae singi dokonya,

“Embame mana tolao minilino dupa pii leleno dokome panenge.
Embame kopeta pilinona lao endakali dupame emba kosimi latamino kandao doko, embame ita minatena,” lapae silyamo.
5 Naimame ^d mana koo miningi dokome Goteme mana tolao miningi doko laitaka pingi. Dopa pingi dokonya naimame aipa latamape? Endakalimi lengeli pyoo lelyona, Goteme naimanya koo pingi dupanya imbu kayao yanu nyingi doko kopeta pingina latamape? 6 Daa, etete dopa nalapenge! Baame tolao napingi pyali kandao doko, aipa petala baame yuunya endakali palenge dupa yapapala yanu nyetana lapumalipi?

7 Nambame ^e sambo lao mana koo minio dokome Goteme lelyamoli pyoo kiningi mana miningi doko minao andasoo baa lalyia. Dopaka doko, “Gote embame aipuma namba koo pingi endakali joo kalyenona latala yanu nyilipina?” latope? 8 Nambame ^f dopa lapuli kandao doko, naimame dapa apata lapumaliaka: “Mana epe dupa pyakaliyina mana koo dupa minama,” lapumali. Kini, endakali yangi dupame naima kandao pii koo lao naimame dopaka lengena lelyamino. Dopa lelyamino endakali dupa-kisa Goteme yanu nyeta doko kapa.

Endakali mendaipi mende epe tolatae daana leamo doko

9 Dopana, ^g naimame endakali waka dupa ita minao katengepe? Daa, naimame dupa mendeme ita naminingi. Doko nambame latelyo. Juta dupapi tata waka dupapi dupa pitaka koonya pupu lapae dokonya pundipundi anjetae katenge. 10 Dokonya ^{h
,} ⁱ dapa lao pepa pyapae silyamo:

“Endakali mendaipi mende epe tolatae daa.
Kini mende etete daa!
11 Endakali mendaipi mendeme masala naenge.
Endakali mendaipi mendeme Gote kutala naenge.
12 Endakali dupa pitakame kaitini tolatae doko yakinatala uanga pyoo payami.
Endakali dupa pitaka awapa koyami.
Endakali mendaipi mendeme mana epe naminingi.
Kini etete mendaipi mendeme daa!
13 Endakali ^j dupanya nenge-kaita pii pyakalyilyamo doko endakali malu lopapae silya dupanya aii pyakalyingi dopale joo pyakalyingi.
Dupame nyakamanya keke kambupi dokome sambo pii koo dupa lengema.
Dupanya kambu dokonya endakali pyao kumasingi tomakai jepae pii dupa palenge.
14 Endakali ^k dupame nyakamanya nengekaita dokome koyasingi piipi pii kaa pipaepi dopale dupaka longo lao lao katengema.
15 Dupame ^{l
,} ^m endakali pyao kumasalanya mona lyaa latae katengema.
16 Endakali dupa kaita paelyamino dupanya kenda pipaepi mana koo minapaepi dupa singi.
17 Epe yuu yongena lao katenge mana doko dupame nakandao katengema.
18 Gote ⁿ andanda semaiyoo katapenge doko dupame masala nayao katengemana,” lapae silyamo.
19 Dee ^o mana setapae dupame lelyamo dupa pitakame endakali dupa-kisa mana setapae silyamo dupa kandao lengena lao naimame masilyamano. Mana setapae dupame lelyamo dupa endakali mendaipi mendeme nenge-kaita nasina lao, Goteme yuunya endakali palenge dupa pitaka kosimi lao yanu nyina lao lenge. 20 Doko, ^p mana setapaenya lapae silyamoli pingi dokonya Goteme endakali mendaipi mende baanya enomba dokonya tolataena nalenge. Mana setapae dupame koo pingi dupa panasoo singi.

Masoo miningi endakali dupa Goteme tolatae lengena leamo doko

21 Dopaka ^q doko, endakali dupame mana setapae mendenya lapae silyamoli napilyaminopa, Goteme mee tolataena lenge doko baame epapu laitaka petea. Moseseme piipi manapi pepa pia dupapi, potopesa dupame pii pepa piami dupapi dupanya dopa lapae silyamoaka. 22 Masoo ^r miningi dokonya-kaita Jisasa Kataisa lao masoo minilyamino endakali dupa pitaka Goteme tolataena lenge. Endakali dupa pitaka mende mendepale daa. 23 Endakali ^s dupa pitakame koo petala Goteme tii pyoo katasetamo dokonya nakatapenge joo katengema. 24 Dopaka ^t doko, Kataisa Jisasame endakali dupa kii tamao nyiamo dokonya, mona epe palenge Gote dokome endakali dupa mee tolataena lenge. 25 Kataisa ^u taiyoko nyetamo dokome Gote baanya mona epe palisakatamopa masoo minatamino endakali dupanya koo pingi yanu dupa kunanya nepakamaitopa latala, baame Kataisa makande minatala epena latea. Baame baanya mana tolao miningi doko panasalanya dopa pia. Doko, yapa yanu nanyingi Gote dokome endakali wamba kateamino dupame koo piamino dupanya yanu nanyia-pyaa. Kini Goteme baanya mana tolao miningi doko indupa panasalanya dopa pia-pyaa. Dopa piamo dokonya Gote baa tolatae. Dee baame Jisasa lao masoo minilyamo endakali doko tolataena lenge.

27 Dopana, ^v tange lalyingi mana doko aipa pilyape? Doko kaitini lyokatae kalyamo. Aki mana mendeme kaitini lyokatae kalyape? Mana setapaenya lapae silyamoli pingi mana dokomepe? Daa! Masoo miningi mana dokome. 28 Doko ^w aipuma? Endakali mendeme mana setapaenya lapae silyamoli napilyamopa Goteme baa masoo miningi dokonya-kaita tolatae lengena lao masilyamano.

29 Aa! ^x Gote baa Juta dupanya ikipi, pande endakali tata waka dupanya apatape? Gote baa endakali tata waka dupanya apataka daape! 30 Gote ^y mendai iki katenge. Elya pingi kambu kepapae akali dupapi kepala naenge dupapi tata dolapo lapota masoo miningi dokonya-kaita baame tolataena lenge. 31 Masoo ^z miningi dokome mana setapae dupa mee injisilyamape? Daa, etete dopa napilyamano! Mana setapae dupa angi injisilyamano.